جو پیچھے رہ گئے!

محترمہ زبیدہ رؤوف کی اس کتاب کو میں نے حرف بہ حرف پڑھا ہے۔ بلکہ کئی موضوعات کو ایک سے زیادہ مرتبہ پڑھا ہے۔ یہ کتاب تمام والدین اور اساتذہ کے ساتھ ساتھ ہر ایک کو پڑھنی چاہیے۔ کیونکہ بچوں کی درست تربیت کے لئے والدین اور اساتذہ کے علاوہ معاشرے کا ہر فرد اہم ہے۔ مصنّفہ نے سائنسی حقائق کے پس منظر میں بچوں کی ذہنی نشوونما کےموضوع پر معاشرتی رجحانات اور اُن کے حل پر ایک اہم تحقیق پیش کی ہے۔ بدقسمتی سے ہم کروڑوں ایسے بچوں کو ضدی،نالائق،کم عقل وغیرہ کا لیبل، یہ سمجھے بغیر لگا دیتے ہیں کہ ان کا رویہ کسی نفسیاتی اور اعصابی مسئلے کی وجہ سے ہے۔یوں ہم ان کو معاشرے کے عمومی دھارے سے الگ کر کے نا صرف ان میں موجود بے پناہ صلاحیتوں سے پورے معاشرے کو محروم کر دیتے ہیں بلکہ اُن بچوں کی زندگی کو بھی تباہ کر دیتے ہیں۔ اس کتاب میں موجود معلومات اس اہم موضوع پر ایک اہم ریفرنس کی حیثیت رکھتی ہیں۔